沙田十年

最近開似唔用xanga，要感性個陣都用facebook

無錯，今日我又有野講。

前排無聊去左估價網check自己住緊既呢幢"會所至平台設計十分獨特，但住宅十分平凡"的帝堡城

(唔信？黎一次你一定信)，樓齡一欄，十一年。



帝堡城係我老豆未落城買樓花個陣買落的，扣除裝修時間，即係我移居沙田都已經有成十年，
人生有幾多個十年？well，呢個我聽到有少少厭，不過我好肯定，成長十年我係沙田過的。搬入沙田，我到現在第一個答出的印象係:空氣好左，以前觀塘日子鼻水多到塞住係個鼻入面變鼻屎。
而家？清過清清。沙田俾我最吸引既地方係空氣，真係好舒服。我有時為左呼吸多一陣呢啲空氣選擇行番屋企(屋企少開窗)，由邊度開始行？近至愉翠苑，遠少少第一城，最誇張既，係沙田新城市。
好阿伯既喜好，我住沙田之後其中一個變相既喜好就係，行路。當然未去到無野做出去行番轉，
但係一定會特登搭平啲行過去。做和民要做收檔個期，攰極都要由新城市行去麗豪酒店。但係攰咩？唔攰喎。或者習慣左，而家讀理工，理工到黃埔？閒事。理工到海港城？閒事。海港城到黃埔？亦是閒事。一而再再而三俾人話過我痴線，第一城落車唔搭巴士番去要行半個鐘？Yes, Thank you! I am crazy!

沙田其實分開左五區，連埋我住緊既小瀝源，由城門河切開四塊，大圍，火炭，禾輋，最後後加馬鞍山(有人以為馬𩣑山同沙田同級，我都俾唔到反應佢地)，因為係觀塘讀書，我絕對甚少進入大圍火炭馬鞍山呢三個地區，直啲講，我係沙田盲。早期夜番到沙田其中一度落車，我好肯定話你聽，我唔識路番屋企。直到而家我都未摸清啲路。因為讀書關係，令到我只會徘徊係新城市，同我屋企附近，行街？新城市廣場囉。跟本無沙田住既朋友，所以甚少出去其他地方，最多去其他邨既酒樓食下飯，當然係陪老豆老媽。

當年沙田盲既我，對於而家改頭換面既新城市，其實好反感，噢，唔好意思，現家既我都對佢無乜好感
，以前新城市其實都好多人，不過無而家咁瘋狂(要用瘋狂一詞，未去過就自己諗下有幾誇張)。以前佐記，班尼奴，你都係，豬二千都係新城市入面，而家？踢晒出去同佢連住既廣場十世。你會見到好大間HMV，馬莎，玩具反斗城，而家走既走縮既縮。我細過玩具反斗城個試玩區好大架囉！仲有好大間既大眾(而家個個算細)，有個十年都唔去，我亦唔覺啲野特別好食又偏遠既Food Court(三期真係有少少遠，加上細過去新城市係跟阿爸阿媽多，駛鬼食Food Court咩！)最最最正的，莫過於音樂噴泉同個個，淨係靠賣報紙都屈晒機既報紙檔。音樂噴泉固之然係我認為最靚既地方，報紙檔就係有一種神奇既魔力同不協調感。你會叱異呢個位有報紙檔？好奇怪喎！但係，佢啲報紙好賣到痴左線！如果唔係新城市玩野佢一定仲可以係度。

最記得新城市要變個陣，岩岩好係觀塘，另一個我活動既地方，出現左APM。兩者無獨有偶俾到我一種感覺，唔上唔落，高不成低不就。我望住APM有既野，開始係新城市出現，以前好街坊Feel既一期二樓(即係去火車站個層)，突然唔見左佐記，班尼奴，你都係同豬二千。變左Estee Lauder, Dior, Shiseido, xxx等化妝品專門店。呢個係我意識到既第一件事。之後就痴左線，當年全港最忙既KFC，突然消失！係消失！要隔左成年幾兩年先係三期出現番。大堆品牌好似izzue, bauhaus, quicksilver, converse, overlander, levi's 等等等等出現係一期上層。就好似一場革命咁，最飛上枝頭變鳯凰既新城市，強行更換所有店舖(當時成鬼日都見到唔同店舖搬位)過左幾年，新城市消費指數真係高左好多，但係都係個句，高不成，低不就。

點解話APM同新城市高不成低不就，其實好簡單，佢地想作為兩大人口集中點(觀塘，唔駛解釋啦？沙田，甚至新界東附近都無同級商場)既旗艦商場，高消費指數不特止，專賣品牌貨，但係要係一啲係人都識既品牌
Agnes B, vivienne westwood, Stage of playlord, Levi's, Chevignon
問題黎啦，入面賣既，全部係Best buy Item.即係點？你想要多啲款阿？去又一城啦！再唔係去中上環老尖佢地既旗艦啦煩！你好有Taste咩？跟風啦你！
This is the message they give.
你為遠唔會係入面見到獨特，需要啲獨特品味既人先識欣賞既item，而係for你做一個又一個既複製人用的物品。即係咩？東施效顰囉！從來未見過佢地會有咩特別既商品，因為佢地舖位太細啦！細到唔尋常。一間品牌佔地三百尺？夠放啲咩？點解唔大啲？因為沙田人既消費力跟本未追得上，新城市亦唔夠「大」(其實太多位俾左食肆)去容納品牌專賣店。就我所見，舖位最大既依然係以前己經係度，消費力無變過既店舖，大眾書局，馬莎(縮左小小水)，皇家運動，百老𣾀(兩間變一間，陰公)反之，新勢力，全部細舖黎，間間都咁細，做就左所謂「麻雀雖少，五臟俱全」。

咁咪無左Self Identity囉！隔離新城市中央廣場(現名Home Square)，有幾多間舖姐，個水牌有幾大？但係每一間都有獨特之處，集大成就係一個賣傢俬既地方，有Cheap cheap 宜家傢俬，亦有貴價Taste Homeless。新城市，你既皇牌又係咩？食？

可能真係食，新城市改革後入得最多既除左潮流服飾點之外，就係食肆，以前二期低層係有條好大既走廊，左右都係食肆(前係以前KFC的地方)，而家？依然好多食肆。不過由以前五十蚊有找一個dinner變左七八十一個，再唔係破百都係話咁易。我以前係一期既和民做。人均目標係150，well，乜香港人咁有錢架咩？咁學生哥可以食啲咩？我得三四十蚊預算咋喎。對唔住，我答唔出。老麥kfc吉仔大快活美心大家樂啦。。。唉！Oliver Super sandwich, Mi-ne Sushi下加一堆我連名都唔記得既食肆，總之好似黎呢度係為左食咁。對唔住，我真係無咁多錢係度食野，可能我唔係佢既對象。但係搞笑既地方係，新城市係成個新界東既居民都會走去既地方（或者用東南，大埔，沙田兩區）而呢堆人亦唔見得特別有錢（除左火炭個堆豪宅人仕）無得食，可以點？行遠啲囉，多得佢變天，我開始走入禾輋，乙明，沙角等邨屋搵茶記，小餐廳。唔想食m記，可以點？終於，有譚仔附近出沒，有吉仔，KFC亦重開，重要開足兩間(不過變到好難食)

希爾頓，沙田中心，好運中心，連城廣場(沙田火車站上蓋,我唔講你會唔會以為新城市先係？),開始接收一眾被新城市踢出黎既街坊標記，班尼奴移前左去左連城，kfc去左沙田中心（早開過三期個間）佐丹奴般左入沙田廣場，如果新城市既IFC,沙田中心，好運，連城，希爾頓算唔算係合和，康樂？

既然有維港巨星，有無沙田英雄？
新城市一二三期，沙田中心，沙田廣場，好運中心，連城廣場，希爾頓中心，偉華商場，最後有孤僻既Home Square，都有十個啦！仲有文化知識既沙田大會堂，Very Nice!

Well.世事非不可能，再十年後，可能另一位沙田小克，為你畫出沙田英雄。

如果你睇晒又睇得明又有少少感觸既，請留個言，哈哈XD